اسمها الحقيقي وسميه العازمي( ام فهد ) من الكويت
عمرها الحقيقي عند وفاتها43سنه
لديها اربع بنات وولدين
توفيت في تاريخ 18/ 3/ 2003م
الساعه العاشرة والنصف مساءا
وقد ذكرعنهاانها انسانه طيبه جدا وهادئه وتكره الاعلام
والمفاجاة ان زوجها لم يكن يعلم بشاعريتها
الا عندما اعترفت له بذلك اثناء مرضها
وزوجها هو من تولى طباعة ديوانها ورفظت
هي ان تستلم دينارا واحدا من مبيعاته
وهذا دليل على روعه هالشاعرة الطيبه رحمها الله ...
مختارات من شعرها
أهلي يدرون إنـي شاعـرة
بس مايدرون في جرح الليالي
يمنعوني من كتابـة خاطـرة
مادروا إني من زمان بهالمجـال
آه لو يدرون اني (( عابرة ))
عندهم بتصير موتتنا .. حلال
***********************
أنا عجوز مطلقـة وأم ورعـان
وأيضاً مدام وبنت وآنس وعانس
أنا بدوية وعايشه عند حضـران
وبنت البحر وأبوي زارع وغارس
أميةٍ ماتعرف حـروف وألـوان
وتلميذةٍ دشت جميـع المـدارس
ظفرة وخبلة عاقلة فـي نقصـان
شرود وأنطح لي ثمانيـن فـارس
خلوني أعيش العبر دون عنوان
طيفٍ يمـر بلارقابـة وحـارس
*************************
تعال بشرح لك أنـا كـل مغلـوق
تعـال شاهدنـي مـع ذكريـاتـي
لا لا يغرك لبس موضة ومسحـوق
انفض غبار الوقـت تلقـي صفاتـي
قرب وطالع معّن الشـوف بحـدوق
وزيف التطور جـرده مـن حياتـي
بتشوف في وجهي من الماضي اطروق
أخذت من بطن الصحـاري صفاتـي
طفلـة بثـوب مخيطينـه ومفتـوق
تنطر جديـد الثـوب بالعيـد ياتـي
سمعت طرف اخبار عن كلمة السوق
وتاخذ وتسأل هـو وجـوده ثباتـي
طفله سحبها الوقـت للهم برفـوق
حتي انها صـارت مـن العاشقاتـي
وجار الزمن وعرض الحـب للعـوق
شـرق ركايبهـا وهـم مشملاتـي
واتلا عهدها فيه يركـض ورا نـوق
مسرود جيب وفـي يدينـه عصاتـي
ويصد لكن يلتفت لي مـن الشـوق
عجـلان يلخصنـي بعيـنٍ تحاتـي
واقفـا وخطواتـه يتلـن معلـوق
وخلانـي ماتنقـل عظامـي عباتـي
ودار الزمان ولا مشي الحظ بوفـوق
ومازلت أخفـي بالظـلام اعبراتـي
ولا زلت أنا العب له علي كل طاروق
حتـي يجيـب الله موعـد وفـاتـي
***********************
كل الصفات اللي ملكها فضيعـه
له ضحكةٍ تشبه لضحكات الأطفال
ذيـبٍ ونظراتـه حنونـه وديعـه
وله فزعةٍ منهـا المجانيـن عقّـال
وفجوج لا ضاقت عليّ الوسيعـه
ياما عدل عوجا ثقيلات وطـوال
وأنـا معاقبتـه غيـورٌ صريـعـه
والله يسوى لـه ثمانيـن رجّـال
**************************
بريال عارضته على السوق بريـال
من باعني برخيـص والله لأبيعـه
من يشتري رجّال قصّر بالافعـال
باع العهـود الماضيـه للخديعـه
رجّال يسوى لـه ثمانيـن رجّـال
والخبل مثلي لا زعل يـب يبيعـه
*************************
حان الفراق .. وتم توديع غاليـن
قسوة زمن وظروف ماهي رحومه
وحاولت ابدّل موقف العسر باللين
وأبيـن قدامـه جسـور ظلومـه
وأعاتبه وأنقد على دمعـة العيـن
وانا - حشـا لله - مانـي ألومـه
وأقول هذا حـال كـل المحبيـن
وهذا الفراق الـي تجينـا علومـه
ومسكت نفسي كن ماصاير شيـن
أخشى على خلي يشقق هدومـه
ثم قلت وش تنطر حبيبي لهالحين؟ !!
أثر ايدينـي ماسكـات كمومـه
**************************
كل ما اتصل فيك.. صبح وليل تشكي لي
من عوج الاوضاع والدنيـا ومتاعبهـا
مليت يا صاحبـي مابيـك تحكـي لـي
هالأسطوانـه أنـا ملـيـت مطربـهـا
حتى خيالـك بتـال الليـل ياتـي لـي
جـروح وعيـون معقـوده حواجبهـا
عيشتنـي بعالـم ماهـو علـى جيلـي
زهـرة شبابـي حـرام انـك تخربهـا
يامـا هجرتـك ولا كملّـت ترحيلـي
حبايـب ماتعـبـر عــن حبايبـهـا
حبيبتـك مـا تحـمّـل هالبهاذيـلـي
إضحـك معاهـا ولاطفهـا ولاعبهـا
هيّـا تغـزل وغـن وزيـد تدليـلـي
البنـت ياحبـهـا لـلـي يداعبـهـا
قلي وش رايـك بفستانـي ومنديلـي؟
الوانهن تعجبك .. أو مانـت راغبهـا؟
وقلي وش رايك بعقدي مع خلاخيلـي؟
وشف قذلتـي يـوم قصينـا ذوايبهـا
وقلي وش رايـك بأطباعـي وأقاويلـي
لاحـظ عليهـا وغيّرهـا وشطّبـهـا
خل بيننـا انقـاش وعلـوم وتعاليلـي
وآمر على البنت وان حبيـت طالبهـا
يامدمـن الهـم كافـي دمـع بالليلـي
بكره تشبـع مـن الدنيـا ومصايبهـا
دنيـاك والله .. ماتسـوى التزاعيـلـي
حتـى ولاهيـب كفـو الـي يعاتبهـا
*************************
يمـه .. يايمـه .. فديتـك لاتخلينـي
بعثرني الهم وأبغـى يديـك تجمعنـي
يمـه افهمينـي تـراك ان مافهمتينـي
مافيـه شخـص بهالدنيـا بيسعمنـي
ماعدت انا طفلتك.. كبرت شوفينـي
خليك يمي تـرى الاطمـاع تتبعنـي
لاتدللينـي .. أبـي منـك تدليـنـي
وابـي ايديـك تداعبنـي وتصفعنـي
ولا انهد حيلي أبي عطفـك يقوينـي
ياما كلامك على الشـدات شجعنـي
وان جيتك ابكي .. ابي منك تهدينـي
مابيك تبكين .. أبغى العقـل ينفعنـي
يامملكة عطـف ياعطـر الرياحينـي
براثـن الهـم والهوجـاس تلسعنـي
بسمتك عندي الا من ضقت تكفينـي
وارضاك عني عن الاحـزان يرفعنـي
اسمى العلاقات تربط بينـك وبينـي
ياللي احضانك ان ضاق الكون تاسعني
لك احترامي وحبي والوفـا .. فينـي
وفيك اروع الحب مايخطي ويخدعنـي
**********************
لي صاحبٍ منه تبي تطلـع الـروح
خبلٍ ومن هي مولعه فيه .. خبلـه
عامين المح له من الجـد ومـزوح
واقول ياعنتـر تناديـك عبلـه
طال المدى ثم قلت انا اغليك يالوح
مجروحه جـرحٍ مخاطـره عجلـه
دنق وقال آنا من العـام مجـروح
وأشر لجرحٍ مبطي وسـط رجلـه
***********************
ياخبلي الغايب متى ترد للعين
متى اشوفك او تجيني رساله
صحيح بالدنيا خبولٍ كثيرين
لكن خبالك ياحياتي لحالـه
************************
أبكسر الاغلال واعيش حره
بصنع قراري وكل شيٍ بيدي
مليت من صبرٍ عطاني مضره
أعيش في عصرٍ لجدّان جدي
**********************
يسألوني عابـره ويـن الجديـد
والاجابه ضايقـه فينـي ملـل
راحت ايام السعاده والقصيـد
عشتها بين التكانـه والجهـل
كنت اروض شارد الحرف العنيد
ماعسرني لو بغيته فـي عجـل
فيه اصور لوعة الحب الاكيـد
ومنّه(اشكل) ماحوى قلبي غزل
ومعه (اسافر) عن معاناتي بعيـد
ولأجل حبه ماشحنّي من زعل
احضنه (فرحة) طفل في يوم عيد
واسكنه (روض) الخزاما والنفل
واحتويته ليت لي (قلب ٍ) بليـد
ماعرف (فرق) الجزاله والهـزل
والنهايه مابقى عنـدي جديـد
واعذروني صارت ايامي ملـل
***********************
دوم يعيرني يقول : انتـي متيـن
((حلقك)) المفتوح لازم نغلقـه
هيه (( يادبـه )) لـزوم تخففيـن
والاا أثور فيك عشريـن فشقـه
وفي رجيمي استمريـت اسنتيـن
جدي اللي مـات بغيـت ألحقـه
ويش رايك؟... قلتها بصون حزين
قال دبه .. وانقلبتي لـى اسلقـه
***********************
باكر يجي يا شيب عيني من الويـل
من عقـب مـا سافـر سنيـنٍ مديـه
ش اقول له صاروا عيالي رجاجيل
ش اقول له ؟ ماني بعهده وفيـه ؟
إن قلـت لـه إنـي تعذبـت بالحيـل
و إن قلـت لـه أكبـر عيالـي سميـه
يبي يعذرني و يتـرك القـال والقيـل
و الا يجـي ويــا زمـانـي علـيـه
وان جبت حظي و المقادير iiتعليل
و اني ضعيف و رغبـة الله قويـه
يبـي يصـدق كلمتـي دوم تحليـل
والا يبـي ينسـف كلامـي عليـه ؟
ش اقول له ؟ما ينفعن الاقاويـل
ما دمت مانـي فـي وعـودي وفيـه
************************
معنى الحياة بعينهـا صحـوت المـوت
شهـود صلـوا والمملـك دفنـهـا
وكوشة فرحهـا حولوهـا لتابـوت
وكليلهـا الأبيـض بقايـا كفنـهـا
تبريكهم أصبح عزا يجـرح الصـوت
صرخـة ويبابـه تشـابـه لحنـهـا
غصب عليها تقبل الوضـع بسكـوت
مهـره وعـادات البـداوة رسنـهـا
أغضت وصدت وأنطلق صوت مكبوت
لابـو تقاليـد الحـيـاة وسننـهـا
وراحت معاه بقلبها حـرف منحـوت
يبقـى معـاهـا يـطـوى بدنـهـا
وراحت وبركان القهـر لاتهـا لـوت
تبي تصيـح وفيـه خـوف سكنهـا
راحت وصدى كلماتها زلـزل بيـوت
لابـو تقاليـد الحـيـاة وسننـهـا
***********************
العيد باكـر أسعـد الله ممسـاك
والله مدري وين خـدٍ جلستـه
وين انت ياللي عيدنا في محيـاك
كف القدر من ضيقة الخلق iiبسته
من يوم ما لوحت لي كف يمنـاك
لليوم دمعي بالخفا مـا حبستـه
ومن يوم ماذوقتني حـر فرقـاك
والياس زرعه في حياتي غرستـه
شريت لي ثوبٍ علي شان لقياك
والثوب راحت موضته مالبستـه
وشريت عطرٍ ما زهانـي بليـاك
اربـع سنيـن بعلبتـه مالمستـه
ودفتر قصيدٍ كل يـوم يترجـاك
مافيه يومٍ ماسهـرت ودرستـه
************************
أنتم تحبوني وانا أحـب ثانـي
واللي أحبه باغيٍ ناس ثانييـن
هذا أبتلى فيني وهذا بلانـي
واللي بلى مبلي وباليه مسكين
أنا ترجيته وغيـره رجانـي
والمشكلة ماينقل القلب حبين
***********************
ياما على نفسي بالأحلام كذبت
ويا ما صبرت وصبرنا مانفعنـا
وياما .. وياما من وداعه تعذبت
وياما نحاول نفترق ما استطعنا
كم مرةٍ ودّع وكم مرةٍ غبـت
وكم مرة عقب الوداع إجتمعنا
لا قادره أنساه مهمـا تهربـت
ولا معترف في حبنا مجتمعنا ..
**********************
ليتنـي البارحـه يانايفـه ماسريـت ..
يـم درجٍ مقفـل مـن قديـم السنيـن
أشهد إني فتحته وأنتحبت وبكيـت ..
شفت ماهيّض الجـرح القديـم الدفيـن
شفت وسطه رسالة وليتني ماقريـت ..
بيت شعـرٍ وظـرف مـع صورتيـن
************************
وهذه القصيده قالتها بزوجها عندما علمت بانها مريضه بالسرطان اعاذنا الله واياكم منه
ترى الذبايـح واهلهـا ماتسلينـي
انا ادري ان المرض لايمكـن علاجـه
ادري تبـي راحتـي يابعـد عينـي
حرام ماقصرت ايديك فـي حاجـه
اخـذ وصاتـي وامانـه لاتبكينـي
لوكان لك خاطرن ماودي ازعاجـه
ابيك في ايدينك تشهدنـي وتسقينـي
وداعتك لايجـي جسمـي بثلاجـة
لف الكفن في ايديك وصف رجلينـي
ماغيرك احدن كشف حسناه وحراجه
ابيـك بالخيـر تذكرنـي وتطرينـي
يجيرني خالقـي مـن نـار وهاجـه
سامح على اللي جرى مابينك وبيني
ايام امشي عـدل وايـام منعاجـه
اعيالي همي وانا اللـي فـي يكفينـي
علمهم الديـن تفسيـره ومنهاجـه
.
.
***********************
وسلامتكم
اطيب المنى
امير الجنوب
الرئيسية 
